MANILA, Philippines – Kasabay ng pagbuhos ng mga tao na nagtutungo sa sementeryo ay bumuhos din ang ulan ngayong Undas.
Dahil dito, karamihan ay minabuti munang sumilong at kanya-kanya namang labas ng dalang payong ang iba.
Nanatiling makulimlim ang panahon ngayon matapos ang 15 minutong pagbuhos ng ulan pero tuloy-tuloy pa rin ang pagdagsa ng mga bumibisita sa loob ng Manila North Cemetery (MNC).
Sa datos ng Manila Police District (MPD), sumampa na sa 710,500 ang naitalang pumasok sa naturang sementeryo na itinuturing na pinakamalaking libingan sa buong bansa.
Marami na rin ang nagsisiuwian dahil sa pag-aalalang abutan ng malakas na buhos ng ulan ngayong hapon.
Samantala, may mga senior citizen namang tinugunan ng mga tauhan ng Manila Disaster Risk Reduction Management Office (MDRRMO) kung saan pawang mga kinuhanan ng blood pressure dahil sa bahagyang pagkahilo at pagod.
Ang isa rito ay ang force multiplier ng V.Mapa na si Aling Virginian Cosina,49 anyos na bigla na lamang tumumba at sa kabutihang palad ay nasalo ng katabing lalaki. Jocelyn Tabangcura-Domenden
