MANILA, Philippines – Iginiit ng Department of the Interior and Local Government (DILG) ang pagbabawal sa paggamit ng government-owned vehicles tuwing weekends at holidays, maliban kung direktang kaugnay sa opisyal na trabaho, ayon sa Memorandum Circular No. 2026-011 na may petsang Pebrero 6.
Ayon sa DILG, “Government vehicles are provided exclusively to ensure the efficient and effective delivery of public service. Their use is a privilege anchored on public trust.”
Idinagdag nila na ang hindi awtorisadong paggamit, lalo na para sa personal na dahilan, ay paglabag sa mga pamantayan ng accountability at integridad.
Saklaw ng polisiya ang lahat ng opisyal at empleyado sa probinsya, lungsod, munisipyo, at barangay, pati na rin ang mga tauhan ng DILG, PNP, Bureau of Fire Protection, at Bureau of Jail Management and Penology.
Binanggit sa circular ang 1987 Constitution, RA 6713, Administrative Code of 1987, at Administrative Order No. 239 na nag-uutos na ang government vehicles ay gagamitin lamang para sa opisyal na layunin. Inutusan ang lahat ng agency at office heads na ipakalat ang polisiya at tiyakin ang full compliance.
Binalaan din ng DILG na maaaring humarap sa administrative o criminal charges ang mga lalabag sa regulasyon. RNT/MND
