MANILA, Philippines – Inaprubahan ng bicameral conference committee nitong Miyerkules, Disyembre 17 ang hiling ng Department of Transportation (DOTr) na ilipat ang P3.6 billion mula sa proposed 2026 budget para pondohan ang common station ng Light Rail Transit (LRT) Line 1 Cavite Extension, maging ang automated fare collection system.
Sa ikaapat na araw ng bicam deliberations, sinabi ni House Committee on Appropriations chairperson at Nueva Ecija Rep. Mikaela Angela Suansing na ang realignment ay manggagaling sa proposed budget para sa dalawang foreign-assisted projects.
Partikular na tinukoy ni Senator Sherwin Gatchalian, chairman ng Senate committee on finance, na ang proposed budget ng Metro Manila Subway Phase 1 at North-South Commuter Railway System ay kailangang bawasan ng tig-P1.8 bilyon.
“As much as possible, we really don’t want to touch projects under the foreign-assisted projects. However, we would like to make it very clear to the public that the request written to both Senator Sherwin and myself emanated from [Transport] Secretary Banoy [Lopez] and he himself identified these two projects as a source,” ani Suansing.
Malaking bahagi ng realignment ay mapupunta sa LRT Line 1 Cavite Extension common station, na nagkakahalaga ng P2 bilyon, habang ang P1.04 bilyon ay ililipat sa systems at facilities improvement ng fare collection system.
Ang nalalabing P614.89 milyon naman ay mapupunta sa operasyon at maintenance ng Metro Rail Transit (MRT).
Ani Gatchalian, nakipag-usap siya kay Lopez at sinabi sa kanya na ang konstruksyon ng LRT1 Cavite extension common station ay long overdue na.
Nais umano ng kalihim na simulan ang proyekto sa 2026.
Para naman sa automated fare collection system, sinabi ng senador na layon umano ng DOTR na gamitin ang pinakabagong teknolohiya para sa maginhawang biyahe ng publiko.
Suportado naman ni Suansing ang pangangailangan na maglaan ng karagdagang pondo para sa operasyon at maintenance ng MRT.
“[This] emanates from the fact that if the common station is not finished by the first quarter of 2027, even if matapos daw po ‘yung MRT7 (the MRT7 gets completed) by the same time, there will be no connectivity to MRT3. So that’s why it’s critical for us to fund this,” sinabi ng House appropriations chair.
Nagbabala rin si Suansing na ang kawalan ng pondo para sa automated fare collection system ay maaaring makaapekto sa paggamit ng Beep Cards sa lahat ng all rail lines sa bansa.
“We will have to revert to cash payment if this is not funded,” anang mambabatas. RNT/JGC
