MANILA, Philippines – Kukuwestyunin ng Department of Justice (DOJ) ang pansamantalang paglaya ng mga akusado sa kaso ng mga nawawalang sabungero.
Iginiit ni Chief State Prosecutor Richard Anthony Fadullon na hindi dapat pinagkaloob ng San Pablo, Laguna at Manila Regional Trial Courts na makapagpiyansa ang mga akusado.
“The position of the department is that notwithstanding the remedy availed of by the accused, elevating the matter to the Supreme Court, the decision that stands, as it is right now, the bail should not have been granted, therefore all the accused should be arrested,” ani Fadullon.
Magugunita na ilang akusado kabilang ang tatlong pulis at ang whistleblower na si Julie Patidongan alyas Totoy ay pansamantalang nakalaya matapos aprubahan ng korte ang kanilang piyansa sa dalawang hiwalay na kaso.
Nakabinbin sa Manila RTC ang apela ng DOJ na mapawalang bisa ang ipinagkaloob na bail kay Patidongan at sa limang iba pa kaugnay sa pagkaksangkot ng mga ito sa insidente sa Manila Arena habang maghahain muli ang DOJ ng motion for reconsideration sa inaprubahan na bail ng Laguna RTC sa isang akusado.
“The department will surely file a motion for reconsideration and consider other options after that,” dagdag ni Fadullon.
Iginiit din ni Fadullon na itinuturing pa rin si Patidongan na akusado sa kaso ng missing sabungero kahit ibinunyag nito na itinapon umano ang mga labi sa Taal Lake.
“He is still an accused in the case, although he may be considered a whistleblower, as of this time, all the things that have been disclosed are still being subjected to validation and evaluation by enforcement authorities.” Teresa Tavares
