MANILA, Philippines – Sinimulan na ng House Committee on Justice ang motu proprio inquiry nito para rebisahin at amyendahan ang Presidential Decree No. 1069 o ang Philippine Extradition Law of 1977.
Layon ng hakbang ng komite na i-update ang extradition framework ng bansa sa harap ng pagtaas ng mga kaso ng cross-border crimes.
Ayon kay Batangas Rep. Gerville Luistro, chairman ng komite, target nila na magkaroon ng pagbabago sa nasabing batas at maiakma ito sa kasalukuyang panahon.
“Extradition is an indispensable tool in the global fight against impunity. It ensures that our country will never be a haven for fugitives or an obstacle to justice sought by our treaty partners,” pahayag ni Luistro.
Ang House inquiry sa extradition law ay napapanahon sa gitna ng kontrobersyal na extradition case ni Apollo Quiboloy, na nahaharap sa kasong sex trafficking, fraud, at bulk cash smuggling, at may nakabinbing extradition request mula sa United States.
Ipinaliwanag ni Luistro na kabilang sa sisilipin ng komite ay ang paglilinaw sa papel ng Department of Justice (DOJ), Department of Foreign Affairs (DFA), at Office of the Solicitor General (OSG) sa paghawak ng mga extradition request.
“Our goal is to craft legislative measures that will streamline procedures, clarify the roles of government agencies, strengthen institutional capacity and reinforce our commitments under bilateral and multilateral treaties,” dagdag pa niya.
Ang imbestigasyon ng komite ay may pahintulot mula sa House Committee on Rules.
Ilan sa inimbitahang resource persons ay mga kinatawan mula sa DOJ, DFA, Anti-Money Laundering Council (AMLC), OSG, National Bureau of Investigation (NBI), Philippine National Police (PNP), at National Security Council (NSC). Gail Mendoza
