MANILA, Philippines – Magsasagawa ang Department of Public Works and Highways (DPWH) ng full geotechnical investigation at repair sa isang bahagi ng Bukidnon-Davao road sa Sitio Kipolot, Barangay Palacapao sa Quezon, Bukidnon, na gumuho noong Sabado ng gabi.
Sa isang pahayag, iniutos ni Secretary Vince Dizon ang isang buong geotechnical investigation na magbibigay-daan din sa departamento na magsimula ng detour road.
Ininspeksyon ni Dizon ang lugar nitong Martes kasama ang DPWH, Mines and Geosciences Bureau (MGB) at mga opisyal ng lokal na pamahalaan upang masuri ang nasirang kalsada.
Makikipag-ugnayan din aniya sila sa MGB para tugunan ang road failure sa landslide area dulot ng hindi matatag na kondisyon ng lupa.
Binanggit ng DPWH chief na prayoridad nila ang mabilis ngunit de-kalidad na pag-aayos ng kalsada, na nagsisilbing mahalagang koneksyon sa pagitan ng Northern Mindanao at Davao Region.
Dumalo rin sa inspeksyon sina Bukidnon Gov. Rogelio Neil Roque, Quezon Mayor Pablo Lorenzo III at DPWH-Region 10 (Northern Mindanao) Director Lilibeth Aparecio. RNT/MND
