MANILA, Philippines – Inaprubahan na sa ikatlo at huling pagbasa ang panukalang gawing permanente ang Assistance to Individuals in Crisis Situations (AICS) Program ng Department of Social Welfare and Development (DSWD).
Sa botong 270-8-2, pasado na ang House Bill No. 6636, na layong makatulong ang AICS program na mapabuti ang buhay ng mga Filipino.
Sa ilalim ng panukala, ang mga kwalipikadong beneficiaries ay maaaring makakuha ng iba’t ibang klaseng tulong gaya ng financial, medical, transportation, food, at material aid. Kasama rin sa programa ang psychosocial support at legal consultation.
Sa oras na maisabatas, magtatatag ng Integrated Program Delivery System at aatasan ang DSWD, katuwang ang Department of Budget and Management at Civil Service Commission, na bumuo ng plantilla positions at staffing pattern.
Papatawan din ng parusa ang mga mang-aabuso sa programa.
“Under Section 13, any person who commits unlawful acts shall be punished by imprisonment of up to six months. If the offender is an LGU official or employee, administrative liability shall likewise apply. For individuals, groups, or organizations found guilty of violating the law, penalties include a one-year suspension from availing DSWD assistance for a first offense and imprisonment of one to six years for a second offense,” nakasaad sa panukala.
Inaatasan din ang mga public at private entities na nagbibigay ng AICS program na tanggapin ang guarantee letters, coupons, checks, o vouchers na iisyu ng DSWD sa mga kwalipikadong beneficiaries.
Nakapaloob din sa panukala ang pagtatag ng Congressional Oversight Committee na kinabibilangan ng limang senador at limang kongresista na itatalaga ng Senate President at Speaker of the House. Kasama sa bubuo ng komite ang chairpersons ng Senate Committee on Social Justice, Welfare, and Rural Development at House Committee on Social Services.
Ang oversight committee ang siyang bibigyan ng mandato na magsagawa ng evaluation sa AICS program sa unang dalawang taon ng implementasyon nito. Gail Mendoza
