MANILA, Philippines – Sinabi ng co-chairperson ng House Infrastructure Committee (InfraComm) na ang pagsuspinde sa mga pagdinig ng Kamara at Senado kaugnay sa maanomalyang flood control projects ay dapat na parehong pagdesisyunan ng dalawang kapulungan ng Kongreso.
Sa news forum, tinanong si Bicol Saro party-list Representative Terry Ridon, co-chair ng three-committee joint InfraComm panel, kung dapat na bang suspendihin ang congressional inquiries sa mga kontrobersiya sa flood control projects dahil lumilikha na si Pangulong Ferdinand Marcos Jr. ng isang independent probe body.
Bilang tugon, sinabi ng mambabatas na “This is something that should be decided jointly by the Senate and the House… to take a step back, to suspend proceedings and to refer everything to the independent commission.”
“But I think, very important is, it is undertaken jointly. Kasi ‘yun na nga, hindi puwedeng Kongreso (House of Representatives) lang ‘yung umatras, or Senado lang ‘yung umatras,” ani Ridon.
Nauna nang sinabi ni Marcos na ang independent investigating commission ay mangangailangan ng forensic investigators, mga abogado, justices, at prosecutors na titingin sa mga ebidensya sa maanomalya at mga ghost flood control projects.
Mag-iisyu umano ang Pangulo ng executive order sa pagtatayo ng isang independent commission.
Inanunsyo ng Malacañang na magsasagawa ang naturang independent body ng komprehensibong pagsusuri sa mga proyekto, pagtukoy sa mga iregularidad, at magrerekomenda ng accountability measures upang masiguro ang tiwala ng publiko sa infrastructure spending. RNT/JGC
