Nagbabala ang PAGASA na magdudulot ang Intertropical Convergence Zone (ITCZ) ng maulap na panahon, kalat-kalat na ulan, at pagkulog-pagkidlat sa Palawan, Visayas, at Mindanao ngayong Biyernes.
Ayon sa ahensya, posible ang flash floods o landslide dahil sa katamtaman hanggang malakas na buhos ng ulan sa mga lugar na ito.
Sa Batanes at Babuyan Islands, asahan ang bahagyang maulap hanggang maulap na kalangitan na may pulos mahihinang pag-ulan dulot ng northeast monsoon, ngunit sinabi ng PAGASA na “no significant impact” ang inaasahan.
Maaaring magkaroon ng isolated rain showers o thunderstorms sa Metro Manila at natitirang bahagi ng Luzon dahil sa localized thunderstorms, kung saan posibleng magkaroon ng flash floods o landslide kapag lumakas ang bagyo.
Mananatiling katamtaman hanggang malakas ang hangin sa Northern Luzon, na may moderate to rough na karagatan. Maliit hanggang katamtamang alon naman ang aasahan sa natitirang bahagi ng Luzon, Visayas, at Mindanao dahil sa light to moderate na hangin. RNT
