MANILA, Philippines- Maharap man o hindi si Vice President Sara Duterte sa impeachment complaints, hindi makikinabang dito ang publiko, ayon kay dating chief presidential legal counsel Salvador Panelo nitong Biyernes.
“May impeachment, walang nangyayari. May impeachment o wala, ‘di nakikinabang ang taumbayan dahil ang interes ng mga nasa kapangyarihan ang inaasikaso nila,” ani Panelo sa isang forum sa San Juan city.
Gayundin, nang tanungin kung karapat-dapat pa si Duterte na maging bahagi ng pamahalaan, sinabi ni Panelo, “Definitely.”
Naghain ang mga kinatawan mula sa civil society organizations ng dalawang impeachment complaints laban kay Duterte, inendorso ni Akbayan Rep. Percival Cendaña at Makabayan bloc lawmakers Rep. France Castro, Rep. Raoul Manuel, at Rep. Arlene Brosas.
Ang basehan ng mga reklamo ay “betrayal of public trust, culpable violation of the Constitution, graft and corruption, bribery, and other high crimes.”
Inilarawan ni Panelo ang impeachment moves bilang political agenda,” at binigyang-diin na “all the forces against the Dutertes will combine whether you like it or not.”
Nang tanungin kung nakikipag-usap ang kampo ni Duterte sa ibang senador para ma-acquit ang Vice President sakaling umabot ang impeachment charges sa Senado, sinabi ni Panelo na walang plano para rito.
“Do your worst, and we’ll do our best. ‘Di sila natitinag,” dagdag niya.
Nauna nang sinabi ni Pangulong Ferdinand Marcos Jr. na ipinag-utos niya sa Kamara na huwag maghain ng anumang impeachment rap laban kay Duterte, idinagdag na hindi ito importante at hindi makatutulong sa buhay ng mga Pilipino. RNT/SA
