MANILA, Philippines – Sa pagpasok sa bansa ng tag-ulan at paulit-ulit na insidente ng mga sunog sa maralitang lungsod, binigyang-diin ni Senador Christopher “Bong” Go ang kahalagahan ng pagpapabilis at ganap na pagpapatupad ng Republic Act No. 12076, o ang Ligtas Pinoy Centers Act.
Hinimok ni Go ang mga kinauukulang ahensya na kumilos nang mabilis sa pagtatatag ng permanente, ligtas, at kumpleto sa gamit na evacuation center sa lahat ng lungsod at munisipalidad, ayon sa iniaatas ng bagong batas.
Pinagtibay noong Disyembre 6, 2024, ang panukalang-batas ay nag-institutionalize ng marangal at maayos na sistema ng pagtugon sa kalamidad sa buong bansa.
Si Go ang punong may-akda at co-sponsor ng batas.
“Walang pinipiling oras o panahon ang kalamidad — sunog man o bagyo, laging may apektadong pamilya. Kaya dapat masigurong may maayos na evacuation center sa bawat lungsod at distrito,” anang senador.
“Naglalayon po ang batas na ito na magtatatag ng mandatory evacuation centers sa lahat ng lungsod at distrito para mapangalagaan ang dignidad ng mga evacuees,” idinagdag niya.
Ginawa ni Go ang panibagong panawagan matapos bisitahin ang mga nasunugan sa Tondo, Maynila.
Si Go ay hindi napapagod sa personal na pagbisita sa mga biktima ng sunog at iba pang kalamidad sa buong bansa upang magbigay ng agarang tulong at marinig mismo ang kanilang mga alalahanin.
“Hindi lang naman legislation ang trabaho ng isang senador. Kasama din sa mandato namin ang oversight para masigurong tama ang ginagawa ng mga ahensya ng gobyerno, representation para makinig sa inyong mga hinaing at maging boses n’yo sa Senado, at constituency — kayo ‘yon bilang aming mga pinagsisilbihan,” sabi ni Go.
Sa kaibuturan ng Ligtas Pinoy Centers Act, obligasyon ng gobyerno na magtayo ng mga standardized evacuation center na nilagyan ng mga feature na kadalasang kulang sa pansamantalang tirahan. Kabilang dito ang sapat na espasyo, mga pasilidad sa sanitasyon, accessibility para sa mga mahihinang grupo, at maayos na bentilasyon — lahat ay idinisenyo upang matiyak ang kaligtasan at dignidad para sa mga pamilyang lumikas.
“Dapat hindi na natutulog sa bangketa ang mga biktima ng sunog o baha. Hindi sapat ang trapal at karton. Taong-bayan ang naghihirap, kaya obligasyon ng gobyerno na bigyan sila ng maayos na pansamantalang matutuluyan,” giit ni Go.
Kinumpirma ng Office of Civil Defense (OCD) na aprubado na ang Implementing Rules and Regulations (IRR). Nabatid nila na ang mga LGU ay kinakailangang magsumite ng mga iminungkahing lokasyon para sa mga evacuation center, na sasailalim sa hazard risk assessments gamit ang data mula sa science-based agencies gaya ng Department of Science and Technology (DOST) at DENR–Mines and Geosciences Bureau (DENR‑MGB).
Bukod dito, isinusulong din ni Go ang mga pangmatagalang solusyon sa pabahay upang matulungan ang mga pamilyang nasalanta ng kalamidad sa muling pagtatayo ng kanilang buhay.
Inihain niya ang Senate Bill No. 192, na nagmumungkahi ng pagtatatag ng Rental Housing Subsidy Program upang magkaloob ng transitional shelter habang ang mga pamilya ay nagrerekober at lumilipat patungo sa permanenteng pabahay.
“Ang hirap mawalan ng bahay, pero mas mahirap kapag wala kang matutuluyan sa gitna ng pagbangon. Kung may renta man, dapat may tulong na maibigay ang gobyerno para makabangon ang pamilya,” sabi pa ni Go. RNT
