MANILA, Philippines – Humingi ng paumanhin ang kura paroko ng Nuestra Señora Del Pilar Shrine and Parish (NSDPSP) sa Mamburao, Occidental Mindoro noong Huwebes para sa konsiyerto sa loob ng simbahan, na umani ng batikos sa social media.
Sa isang pahayag, inako ni Rev. Fr. Carlito Dimaano ang responsibilidad sa gulo na nag-ugat sa fund-raising concert na pinamagatang “Heavenly Harmony in Concert (Harana para kay Maria)” noong Okt. 6.
Humingi rin siya ng paumanhin sa mga guest performers, ang mga mang-aawit na sina Julie Anne San Jose at Jessica Villarubin, na naging paksa ng bashing sa social media sa kaganapan.
Pinuna ng mga netizens si San Jose dahil sa pagsusuot ng hindi naaangkop na pananamit at pagkanta ng mga sekular na kanta tulad ng “Edge of Glory” ni Lady Gaga, “Dancing Queen” ng ABBA, at “The Climb” ni Miley Cyrus sa harap ng altar ng simbahan.
Ang Apostolic Vicariate of San Jose ay humingi din ng pang-unawa sa mga mananampalataya. (Jocelyn Tabangcura-Domenden)
