Pasok sa iskul, gobyerno sa Metro Manila, 9 probinsya sinuspinde ng Malakanyang

MANILA, Philippines – BUNSOD ng patuloy na pag-ulan dala ng Southwest Monsoon, sinuspinde ng Malakanyang ang trabaho sa gobyerno at klase sa lahat ng antas sa Metro Manila, Cavite, Rizal, Batangas, Laguna, Bulacan, Pampanga, Zambales at Bataan, ngayong araw ng Lunes, Hulyo 21, pagsapit ng ala-1 ng hapon.

Ito ang nakasaad sa Memorandum Circular No. 88 na nilagdaan ni Executive Secretary Lucas Bersamin, sa awtoridad ng Pangulo.

Gayunman, ang mga ahensya na ang tungkulin ay ang paghahatid ng mga pangunahin at serbisyong pangkalusugan, paghahanda/ pagtugon sa mga sakuna at kalamidad at o pagganap sa mahalagang serbisyo ay magpapatuloy sa kanilang operasyon at pagbibigay ng kinakailangang serbisyo.

Samantala, ang suspensyon sa trabaho sa pribadong kompanya at tanggapan ay ipinauubaya naman ng Malakanyang sa diskresyon ng kani-kanilang pinuno.

Ang nasabing Circular ay kagyat na magiging epektibo. Kris Jose