MANILA, Philippines – Sinabi ni Department of Economy, Planning and Development Secretary Arsenio Balisacan na ang partisipasyon ng Pilipinas sa inisyatiba ng US-led Pax Silica ay maaaring makatulong na i-diversify ang ekonomiya sa pamamagitan ng paghikayat ng mga investment sa industrialization at value-adding activities.
Ani Balisacan, nagpapatuloy ang pag-uusap ukol sa Pax Silica subalit nakatutok sa potensiyal na inisyatiba para makapagpapasok ng investments na maaaring makapagpalakas sa higher-value economic activities sa bansa.
“Moving discussion pa ‘yan sa Pax Silica but let’s say, you have seen my presentation, right? We have to diversify the economy, and things like Pax Silica, to the extent that we’re able to attract investors that promote industrialization, value-adding activities, economic activities,” ayon kay Baliscan sa isang ambush interview sa isinagawang Economic Journalists Association of the Philippines (EJAP) Forum, araw ng Biyernes.
Aniya, ang ganoong pamumuhunan ay maaaring makapagpahusay sa kalidad ng economic growth ng bansa.
Inurirat din si Balisacan ukol sa environmental concerns na nakapalibot sa inisyatiba, kabilang ang potensiyal na paggamit ng tubig at enerhiya.
Aniya, napag-usapan ang environmental safeguards at base sa kanyang pagkakaunawa, kinokonsidera ang mga teknolohiya at hakbang para protektahan ang kapaligiran.
“I think… those have been properly discussed. And according to the BCDA, which has been preparing the master plan, there are technologies and there are assurances that there are safeguards to ensure that the environment is protected,” ayon sa Kalihim.
Nilinaw naman ni Balisacan na batay sa kanya pa ring pagkakaunawa, ang Pax Silica ay hindi limitado sa artificial intelligence o data centers.
“Again, as I understand it, the Pax Silica is not about AI or data centers which uses a lot of water and power. It’s much more than that,” anito.
Ang Pax Silica ay isang U.S.-led initiative para palakasin at protektahan ang supply chain ng AI, semiconductors at AI technologies.
Layunin ng Pax Silica na mabawasan ang sobrang pagdepende sa iilang bansa para sa chips at mahahalagang mineral. (KRIS JOSE)
