SAMAR, Philippines – Napigilan ang tangkang pagbabalik ng mga miyembro ng New People’s Army (NPA) sa ilang liblib na barangay ng Matuguinao, Samar matapos agad na iulat ng mga residente ang kanilang presensya sa mga awtoridad.
Ayon kay Mayor Aran Boller, nagsagawa ng security operation ang 43rd Infantry Battalion sa pamumuno ni Lt. Col. Jason Que, na naging dahilan upang hindi makapasok ang armadong grupo sa komunidad. Hindi sinabi ng alkalde kung ilan ang mga armadong lalaki o kung nagkaroon ng engkuwentro.
Sinabi ni Boller na ipinapakita ng insidente ang kahalagahan ng pagdeklara sa Matuguinao bilang insurgency-free noong Hunyo 8, dahil naging mas aktibo ang mga residente sa pagprotekta sa kapayapaan at seguridad.
Aniya, kapag may kahina-hinalang kilos o tangkang pagpasok ng armadong grupo, agad itong iniuulat ng mga residente sa barangay at mga awtoridad.
Matagal nang itinuturing ang Matuguinao bilang isa sa mga dating balwarte ng insurgency sa Samar, kung saan maraming opisyal ng pamahalaan, sundalo, at sibilyan ang nasawi sa mga insidente kaugnay ng rebelyon.
Hinimok din ng alkalde ang publiko na huwag basta maniwala o magbahagi ng hindi beripikadong impormasyon sa social media at sa halip ay umasa sa opisyal na impormasyon mula sa lokal na pamahalaan at mga awtoridad.
Binigyang-diin niya na ang maagang pag-uulat, kooperasyon, at pagkakaisa ng komunidad ang susi sa pagpapanatili ng kapayapaan at pag-unlad ng Matuguinao. RNT/MDS
