MANILA, Philippines – Bibiyahe si Pangulong Ferdinand R. Marcos Jr. sa Cambodia para sa isang state visit mula Setyembre 7 hanggang 9, kung saan makikipagpulong siya kay Cambodian Prime Minister Samdech Moha Borvor Thipadei Hun Manet at sa mga business leaders.
Makakasama ng Pangulo ang Unang Ginang Liza Araneta-Marcos sa pagbisitang ito, alinsunod sa imbitasyon ni Cambodian King Preah Bat Samdech Preah Boromneath Norodom Sihamoni.
“The President and the First Lady will be received by acting Head of State and Senate President Samdech Akka Moha Sena Padei Techo Hun Sen and his spouse, Samdech Kittiprittbindit Bun Rany Hun Sen, on behalf of His Majesty,” ayon sa kalatas ng Malacañang.
Dagdag pa rito: “The President will hold a bilateral meeting with Samdech Moha Borvor Thipadei Hun Manet, Prime Minister of Cambodia, to discuss expanding cooperation in combating transnational crimes and enhancing connectivity, as well as in the key sectors of agriculture, higher education, tourism, and cultural cooperation between the two countries.”
Inaasahang makikipagpulong din ang Pangulo sa mga pangunahing business leaders mula sa Pilipinas at Cambodia sa isang roundtable dialogue upang magsaliksik ng mga paraan para pag-iba-ibahin ang pinagmumulan ng kalakal at palawigin ang market access sa pagitan ng dalawang bansa.
Layon ng business meeting na itaas ang antas ng bilateral at intra-ASEAN (Association of Southeast Asian Nations) trade.
Bukod dito, nakatakdang makipagpulong si Pangulong Marcos sa Filipino community sa Cambodia upang personal na iparating ang kanyang pasasalamat sa kanilang kontribusyon sa economic at socio-cultural development ng parehong Pilipinas at Cambodia.
Sa kasalukuyan, may mahigit 7,000 Filipino ang naninirahan sa Cambodia, karamihan sa kanila ay nagtatrabaho sa larangan ng edukasyon at serbisyo.
Ang napipintong state visit ng Pangulo ay pagtugon sa opisyal na pagbisita ni Hun Manet sa Pilipinas noong Pebrero 2025.
