MANILA, Philippines – Nagpulong sina Pangulong Ferdinand Marcos Jr. at International Committee of the Red Cross (ICRC) President Mirjana Spoljaric Egger kung saan tinalakay ang papel ng Pilipinas para i-promote ang paggalang sa international humanitarian law (IHL) sa Asia-Pacific region.
Sa isinagawang courtesy call sa Palasyo ng Malakanyang, sinabi ni Pangulong Marcos na nananatiling committed ang Pilipinas na panindigan ang IHL bilang pundasyon ng kapayapaan, seguridad at human dignity.
“Upholding international humanitarian law largely rests on the firm resolve of national governments. Ultimately, we bear the responsibility of translating international commitments into domestic policies and practices to protect the most vulnerable,” aniya pa rin.
Binigyang diin naman ni Spoljaric na ang membership ng Pilipinas sa Association of Southeast Asian Nations ay makatutulong para tugunan ang ‘urgent humanitarian crises’ at pagyamanin ang dayalogo para sa tigil-putukan sa conflict areas.
Ang ICRC ay isang independent humanitarian organization na ang mandato ay nanggaling mula sa Geneva Conventions, na ‘universally’ ratified ng estado kabilang na ang Pilipinas.
Ang courtesy call ay sinundan ng IHL Asia-Pacific Regional Conference na isinagawa noong August 11–14, co-hosted naman ito ng Pilipinas at ICRC.
Dahil sa nasabing event, nabigyan ang Pilipinas ng oportunidad na ibahagi ang karanasan nito sa pagtatatag ng Inter-Agency Committee on IHL sa pamamagitan ng Executive Order 77, tinintahan ni Pangulong Marcos noong nakaraang taon. /Kris Jose
