MANILA, Philippines – UMAASA si Pangulong Ferdinand Marcos Jr. na maiiwasan ang agresyon ng mga tsino sa West Philippine Sea kasunod ng Multilateral Maritime Cooperative Activity (MMCA) kabilang ang Pilipinas, Estados Unidos, Japan at Australia sa rehiyon.
Sa isang panayam sinabi ng Pangulo na patuloy na nakikipag-usap ang mga opisyal ng Pilipinas sa kanilang Chinese counterpart upang hindi na tumaas pa ang tensyon sa rehiyon.
“I sincerely hope so. I really do. I really do. We’re trying everything. We continue to talk at a ministerial level, at a sub-ministerial level, at a people-to-people level– lahat ng maaari nating gawin, ginagawa natin para makausap ang Chinese leadership, ang Beijing, makausap sila na ‘wag na natin masyadong pag-initan pa. Mag-usap tayo nang mabuti para walang banggaan, walang cannon, water cannon,” ang litaniya ni Pangulong Marcos.
At nang tanungin naman ukol sa assessment sa maritime activity, sinabi ni Pangulong Marcos na “Par for the course. The cruises that we are doing, something that have been planned for a long time, the interim reports that I am getting is that very useful talaga in terms of the interoperability so that each navy knows how the other navy operates.”
Ayon sa Armed Forces of the Philippines (AFP), kasali sa MMCA ang Australian Defense Force (ADF), Japan Self-Defense Forces (JSDF), at United States Indo-Pacific Command (USINDOPACOM).
Nagsagawa naman ng communication exercises at division tactics ang naval at air forces ng apat na bansa.
Samantala, kabilang naman sa activity participants ang BRP Gregorio Del Pilar na may AW109 helicopter, BRP Antonio Luna na may AW159 Wildcat ASW helicopter, at BRP Valentin Diaz mula Philippine Navy. Kris Jose
