MANILA, Philippines- Tinanggap ng Philippine Coast Guard (PCG) ang dose-dozenang donasyon mula sa gobyerno ng Australia para sa pagpapabuti ng komunikasyon sa pagitan ng kanilang assets at mga istasyon sa Palawan.
Ang mga donasyon na mga ‘very high frequency’ (VHF) radios ay bahagi ng mas malawak na P328 milyong civil maritime cooperation ng Australia sa Pilipinas kabilang ang vessel remediation, aerial drones, postgraduate scholarships, operational training at annual Law of the Sea courses.
“Australia is proud of our strong cooperation with the PCG. As Strategic Partners, we will continue to listen and respond to the PCG’s needs,” pahayag ni Australian Ambassador to the Philippines HK Yu.
Sinabi ng Embahada ng Australia sa Maynila nitong Martes na ang nasabing mga donasyon ay layon na palakasin ang strategic capabilities ng PCG Palawan upang bantayan ang insidente sa karagatan, tumugon sa emerhensiya at pakikipag-ugnayan sa maritime operations na suporta sa modernization efforts nito.
Itinurn-over ang donasyon sa isang seremonya na ginanap sa PCG headquarters sa Manila at tinanggap ni PCG Commandant Admiral Ronnie Gavan at ni Commodore Dennis Rem Labay, PCG Palawan district commander.
Kinatawan naman ng gobyerno ng Australia sina Department of Foreign Affairs and Trade Secretary Jan Adams at Yu.
Matatandaang lumagda ng memorandum of understanding ang Australia at Pilipinas sa Enhanced Maritime Cooperation para palakasin ang pakikipagtulungan sa civil maritime realm. Jocelyn Tabangcura-Domenden
