MANILA, Philippines – Gumamit na ng ibang stratehiya sa pamamagitan ng sound navigation and ranging (sonar) technology ang mga awtoridad matapos mabigo ang mga naunang underwater drone missions na mahanap ang M/V Trisha Kerstin 3.
Ayon kay Hadji Muhtamad Mayor Arsina Kasing-Nanoh noong Linggo, ang unang ginamit na Remote Operated Vehicle (ROV) ay hindi pa nahahanap ang barko.
Kaya’t inirekomenda ng lokal na pamahalaan (LGU) ang paggamit ng sonar technology sa Philippine Coast Guard (PCG) upang makatulong sa paghahanap.
Sinabi ni Kasing-Nanoh na nakikipag-ugnayan sila sa PCG para sa pagsasagawa ng sonar operations upang mapabilis at mapahusay ang paghahanap sa nawawalang M/V Trisha.
Dagdag niya, magsisimula ang operasyon ngayong Lunes, Pebrero 2.
Ang paglipat sa sonar technology ay dulot ng hirap ng PCG team sa pag-navigate sa ilalim ng tubig gamit ang visual-based ROVs.
Ipinaliwanag ng alkalde na gumagana ang sonar technology sa pamamagitan ng pagpapalabas ng sound waves na tumatama sa mga bagay sa ilalim ng dagat, na nagbibigay-daan sa rescuers na makita ang wreckage kahit sa mababang visibility.
Ang LGU ng Hadji Muhtamad ang nanguna sa inisyatibo, katuwang ang mga partner mula sa pribadong sektor upang magbigay ng kinakailangang kagamitan.
Tiniyak ng alkalde na patuloy na sumusuporta ang lokal na pamahalaan sa mga pamilya ng mga biktima habang pumasok ang operasyon sa mas teknikal na yugto.
Ang M/V Trisha ay lumubog sa tubig malapit sa Baluk-Baluk Island, Basilan noong Enero 6, alas-12:00 ng madaling araw, na nagresulta sa pagkamatay ng 40 katao habang marami pa ang nawawala. Sa kabuuan, 317 sa 332 na pasahero ang nakaligtas.
Ayon sa alkalde, hindi pa nagbibigay ang PCG ng pormal na pahayag ukol sa sonar sweep, ngunit inaasahang magpapatuloy ang operasyon sa huling kilalang posisyon ng barko.
Noong Enero 30, isang indibidwal na si Vinz Mith ang nag-post sa social media tungkol sa lokasyon ng gadget ng kanyang kapatid, isang iPad, na inaasahang makakatulong sa mga divers na matukoy ang nawawalang barko. Jocelyn Tabangcura-Domenden
