AURORA, Philippines – Nagsagawa ang Food and Drug Administration (FDA) ng operasyon sa Aurora at nagsamsam ng umano’y pekeng anti-rabies vaccines matapos mamatay ang isang walong taong gulang na pasyente dahil sa rabies.
Natukoy ng FDA ang mga pekeng bakuna bilang “Equirab,” na may batch numbers na nakalista sa FDA Advisory No. 2025-1415. Sa koordinasyon ng lokal na pamahalaan, ininspeksyon ng FDA ang mga botika malapit sa Aurora Memorial Hospital noong Pebrero 10.
Natuklasan ang mga paglabag sa pagbebenta, paghawak, at imbakan ng bakuna. Walang maipakitang valid procurement at distribution documents ang nagbebenta ng Equirab para patunayan ang pagiging lehitimo ng produkto. Iba pang botika na may valid FDA licenses ay nagbenta rin ng bakuna kahit walang awtorisasyon.
Nadokumento rin ang critical cold chain violations, tulad ng pag-iimbak ng bakuna sa household refrigerators kasama ang iba pang produkto, na maaaring makaapekto sa kaligtasan at bisa ng bakuna. Lahat ng stock ay na-seal at nakumpiska para sa verification at regulatory proceedings.
Noong Pebrero 11, isinagawa ang product traceability sa Alua, San Isidro, Nueva Ecija, at natuklasan ang distributor na walang sapat na dokumento at tamang storage equipment para sa biological products.
Nagbabala ang FDA na ang pekeng o maling pag-iimbak ng bakuna ay maaaring magdulot ng seryosong panganib sa kalusugan, treatment failure, komplikasyon, o kamatayan. RNT/MND
