MANILA, Philippines – Naglunsad ng operasyon ang Philippine National Police–Highway Patrol Group (HPG) laban sa mga sasakyang gumagamit ng pekeng green license plate na nakalaan lamang para sa hybrid at electric vehicles (HEVs at EVs).
Ayon kay Police Colonel Hansel Marantan, acting director ng HPG, may ilang motorista ang gumagamit ng pekeng green plate upang makaiwas sa number coding scheme, kahit hindi kabilang sa opisyal na talaan ng Department of Energy (DOE) ng mga lehitimong electric at hybrid vehicle.
“Those motor vehicles sporting green plates that are not supposed to use that because it is illegal… The intention is to evade coding schemes,” ani Marantan. “Tanggalin namin sila.”
Sinabi ni Marantan na nakatanggap na ng opisyal na listahan mula sa DOE ang HPG na naglalaman ng libu-libong rehistradong HEVs at EVs.
Babala niya, ang mga mahuhuling motorista ay mabibigyan ng tiket, kukumpiskahin ang kanilang pekeng plaka, at ire-refer sa Land Transportation Office (LTO) para sa karampatang parusa.
“We will give them a ticket immediately… They must pay the fine and fix their plate,” dagdag ni Marantan.
Batay sa Electric Vehicle Industry Development Act (EVIDA), ang mga hybrid at electric vehicle na may green plate ay exempted sa number coding scheme hanggang 2030. Santi Celario
