MANILA, Philippines – Isususpinde ng Philippine National Police (PNP) ang permit to carry firearms outside of residence (PTCFORs) sa Metro Manila mula Sabado hanggang Lunes (Nobyembre 29 hanggang Disyembre 1) para sa isasagawang ikalawang Trillion Peso March.
Ang anunsyo ay dumating sa isang memorandum na inilabas ni Acting PNP Chief Lt. Gen. Jose Melencio Nartatez Jr. na may petsang Nobyembre 27 at ipinadala sa mga mamamahayag sa Camp Crame nitong Biyernes.
“In view of the Trillion Peso March… permits to carry firearms outside of residence are hereby suspended in Metro Manila from 12:01 a.m. of Nov. 29, 2025 to 11:59 p.m. of Dec. 1, 2025,” nakasaad sa memo.
“Only members of the AFP, PNP and other law enforcement agencies performing official duties and in agency-prescribed uniforms are allowed to carry firearms,” dagdag nito.
Nauna nang sinabi ng PNP na magde-deploy ito ng 15,000 pulis para siguruhin ang mga demonstrasyon at inaasahan ang 300,000 dadalo sa mga rally sa buong Metro Manila.
Ang ikalawang Trillion Peso March sa Nobyembre 30 (Linggo) ay kabilang sa serye ng mga protesta na nagmumula sa umano’y katiwalian sa pagbaha at iba pang proyektong pang-imprastraktura. RNT/MND
