NEW YORK- Mahigpit na binabantayan ng Philippine Consulate General sa New York ang umiigting na pro-Palestinian demonstrations ng mga estudyante sa mga unibersidad at kolehiyo sa northeastern United States.
Mahigit 400 na ang naaresto, kabilang ang mga mula sa Columbia University, New York University, at City College of New York, kung saan maraming Pilipino at Filipino-American students ang nag-aaral at nagtuturo.
Ayon sa New York Police Department, 30 porsyento ng mga nadakip na indibidwal ay hindi estudyante.
Ayon sa Philippine Consulate General, wala pa umano silang natatanggap na ulat na mayroong naarestong Pilipino.
“While the Philippine Consulate respects the rights of every individual to freedom of expression and peaceful assembly, we urge all Filipinos, especially non-citizens, to comply with applicable laws to avoid legal risk. The Filipino Community is advised to stay informed, exercise caution, and prioritize personal safety,” paalala nito.
Tiniyak din ng konsulado na handa silang magbigay ng tulong sa mga Pilipinong apektado ng umiiral na kilos-protesta. RNT/SA
