MANILA, Philippines – Nakipagpalitan ng kaalaman at karanasan sa anti-terror laws ang hudikatura ng Pilipinas sa Australia.
Ang delegasyon ng Philippine Judiciary sa Counter-Terrorism Learning Exchange sa Australia noong Agosto 2–9, 2025 ay pinangunahan nina Supreme Court (SC) Associate Justices Rodil Zalameda, Jose Midas Marquez, at Raul Villanueva.
Kasama sa grupo ang mga opisyal ng SC Office of the Judiciary Marshals, Philippine Judicial Academy, mga hukom ng anti-terrorism courts, at mga abogado ng SC.
Nakipagpulong ang delegasyon sa Attorney-General Department, National Security Legislation Monitor, at Australian Federal Police ng Canberra.
Nakipag-ugnayan din ang hudikatura ng Pilipinas sa High Court of Australia at pinag-aralan nila ang sistema ng hustisyang kriminal at national security laws ng Australia.
Nakipagkita rin sila sa mga Justices ng Supreme Court of New South Wales at bumisita sa Judicial Commission of NSW, Sheriff’s Office, Legal Aid NSW, at Institute for Economics and Peace sa Sydney upang matuto sa karanasan ng Australia sa pagdinig ng kaso ng terorismo, seguridad ng korte, at suporta sa mga akusado.
Ang naturang learning exchange ay bahagi ng pagsisikap ng SC na palakasin ang mekanismo ng bansa laban sa terorismo, kasunod ng inilabas na Rules on the Anti-Terrorism Act of 2020 noong 2024. Ang programa ay sinuportahan ng Pamahalaan ng Australia. Jocelyn Tabangcura-Domenden
