MANILA, Philippines- Target ng Pilipinas na makapwestong ikatlo sa Internet connectivity sa Southeast Asia, kasama ang patuloy na investment ng gobyerno sa pagsasaayos ng connectivity.
Sinabi ni Department of Information and Communications Technology (DICT) Secretary Ivan John Uy, ang bansa ay ika-anim sa Internet penetration sa hanay ng Southeast Asian countries, isang kapansin-pansing pagtalon mula sa kinalalagyan nito sa ika-siyam.
“We were able to do that in less than two years,” ang sinabi ni Uy sa isinagawang pangalawang araw ng “Build Better More” Infrastructure Forum sa New Clark City.
“We aim that if we continue in this trajectory, of 14 percent increase in our index in the past years, then I’m hoping that by 2028, we would probably be the top three in ASEAN,” dagdag na pahayag nito.
Tinuran ni Uy ang kahalagahan ng patuloy na pamumuhunan para maayos ang Internet connectivity para manatiling competitive sa mga kalapit-bansa nito.
“Our ASEAN neighbors are not sitting back and relaxing, they are also infusing huge amounts of investments in their Internet connectivity. So, we need to double what they are putting. If they are putting one peso, we need to put two pesos because we’re the ones trying to catch up,” anang opisyal.
Nauna rito, inaprubahan ni Pangulong Ferdinand Marcos Jr. ang Philippine Digital Infrastructure Project (PDIP) na naglalayong mapahusay at masiguro ang broadband connectivity sa bansa.
Ang proyekto ay popondohan ng tinatayang P16 bilyon sa pamamagitan ng Overseas Development Assistance (ODA) loans at magiging kauna-unahan at pinakamalaking ODA loan ng Pilipinas sa World Bank International Bank for Reconstruction and Development.
Ang proyekto ay isa sa flagship programs ng Department of Information and Communications Technology (DICT) para sa isang climate-resilient at matatag na broadband connectivity sa Pilipinas.
Nakapaloob sa proyekto ang konstruksyon ng public broadband infrastructure network upang masiguro ang walang sablay at malakas at maaasahang broadband connectivity sa bansa.
Iniulat din ni Uy na mayroong 13,462 free Wi-Fi sites sa 1,401 lungsod at munisipalidad sa iba’t ibang bahagi ng bansa kabilang na ang 3,040 Geographically Isolated and Disadvantaged Areas (GIDAs).
Samantala, may kabuuang 9.8 milyong Pinoy naman ang makikinabang mula sa Free Public Internet program ng DICT, sabay sabing nais ng DICT na maabot ang 125,000 free Wi-Fi sites sa buong bansa sa 2028. Kris Jose
