Mas kaunti ang mga Pilipinong nag-ulat na lubos na masaya sa kanilang buhay pag-ibig, ayon sa pinakabagong survey ng Social Weather Stations (SWS).
Ayon sa pambansang survey na isinagawa mula Nobyembre 24 hanggang 30, 2025 sa 1,200 matatanda, 46 porsiyento ang nagsabing sila ay lubos na masaya sa kanilang buhay pag-ibig, 40 porsiyento ang nagsabing maaari pa silang maging mas masaya, at 14 porsiyento ang nagsabing wala silang love life. Ang 46 porsiyento ay nananatiling pinakamababang naitalang antas mula nang unang itanong ang katanungan noong 2004.
Kumpara sa 2024, tumaas ng apat na puntos ang nagsabing maaari pa silang maging mas masaya, habang bumaba ng apat na puntos ang walang love life.
Sa mga babae, pinakamataas ang kasiyahan sa buhay pag-ibig sa mga may asawa sa 57 porsiyento, sinundan ng may live-in partner sa 45 porsiyento, at sa wala pang asawa o partner sa 22 porsiyento. Kumpara sa 2024, tumaas ng tatlong puntos ang kasiyahan ng mga may asawa, bumaba ng walong puntos sa may live-in partner, at bumaba ng dalawang puntos sa wala pang asawa o partner.
Sa mga lalaki, pinakamataas ang kasiyahan sa mga may asawa sa 55 porsiyento, sinundan ng may live-in partner sa 50 porsiyento, at sa wala pang asawa o partner sa 28 porsiyento.
Kumpara sa 2024, tumaas ng siyam na puntos ang kasiyahan ng mga walang asawa o partner, nanatiling halos pareho sa may live-in partner, at bumaba ng anim na puntos sa mga may asawa.
Isinagawa ang Fourth Quarter 2025 Social Weather Survey sa pamamagitan ng face-to-face na panayam sa 1,200 matatanda sa buong bansa, na may margin of error na ±3 porsiyento sa pambansa at ±6 porsiyento bawat rehiyon. Santi Celario
