MANILA, Philippines- Nananatiling nasa maayos na kondisyon ang marine biodiversity sa Rozul Reef sa West Philippine Sea sa kabila ng pagkuha at pagkapinsala ng corals, ayon sa Bureau of Fisheries and Aquatic Resources (BFAR) nitong Huwebes.
Sinabi ni BFAR spokesperson Nazario Briguera na sa halip ay dapat tutukan ng Pilipinas ang crushed corals na namataan sa seabed ng Rozul Reef.
“In terms of marine biodiversity, may mga initial reports na nagsasabi na in good condition pa naman ‘yung marine biodiversity sa Rozul Reef,” pahayag ng opisyal sa isang public briefing.
“Pero kailangan mas tingnan ‘yung mga buhangin or coral ravels, titignan kung man-made ba ito or talagang ito ‘yung natural appearance ng mga corals doon sa lugar,” dagdag niya.
Makikita sa isang underwater video na kuha sa Rozul Reef ang maputlang kulay ng crushed corals, base sa ulat nitong Huwebes.
Sa kabila nito, mayroong mga senyales na nakakarekober ang biodiversity, tulad ng nakitang clownfish sa sea anemone nito at maliit na isdang naglalangoy malapit sa patay na corals.
Sinabi ni Briguera na kailangan ng masusing imbestigasyon at pagsasaliksik upang matukoy kung ang crushed corals sa Rozul Reef ay gawa ng tao.
Noong September 2023, iniulat ng Philippine Coast Guard (PCG) ang “severe damage” sa marine environment at coral reef sa seabed ng Rozul Reef at Escoda Shoal.
Kasunod ito ng unang pag-uulat ng Armed Forces of the Philippines Western Command ng kaso ng malawakang coral harvesting sa Rozul Reef.
Ang lugar na ito, saklaw ng exclusive economic zone ng bansa, ay ang lokasyon kung saan namataan ang Chinese military at militia vessels.
Itinanggi ng China’s Ministry of Foreign Affairs na ang mga Chinese ang responsable sa pinsala sa corals sa West Philippine Sea.
“The Philippines’ accusations have no factual basis. We urge relevant party of the Philippines to stop creating a political drama from fiction,” pahayag ni Chinese Foreign Ministry spokesperson Mao Ning noong nakaraang taon. RNT/SA
