MANILA, Philippines – Hindi maaapektuhan ang kaso ni Kingdom of Jesus Christ (KOJC) leader Apollo Quiboloy na nakasampa sa korte sa kasunduan naman na binuo sa prosecutors ng Estados Unidos at ng dating nitong administrador sa KOJC.
Si Marissa Duenas, human resources manager ng KOJC ay pumayag sa plea bargain deal sa US prosecutors kung saan kapalit ng kanyang guilty plea, ibabasura ng US ang lahat ng kaso niya na human trafficking, money laundering at forced labor.
Nilinaw ni Department of Justice Spokesperson Mico Clavano na tanging ang mga kaso laban kay Duenas ang sakop ng plea bargain at mananatili ang pagdinig sa kaso laban sa ibang akusado kabilang si Quiboloy.
Si Quiboloy ay kasalukuyang nasa kustodiya ng Philippine National Police matapos maglabas ng arrest order ang QC RTC at Pasig RTC sa kasong qualified human trafficking at sexual at child abuse.
Paborable pa aniya sa DOJ ang plea deal ni Duenas dahil maaari itong magamit ng prosekusyon laban kay Quiboloy.
“Our prosecutors will use that, because they know that a co-respondent of Quiboloy has already admitted to this in another jurisdiction,” ani Clavano.
Si Duenas ay kabilang sa mga naaresto ng mga ahente ng Federal Bureau of Investigation matapos ang raid sa Van Nuy, Los Angeles, California noong February 2020. TERESA TAVARES
