MANILA, Philippines – Iniulat ng Philippine National Police (PNP) nitong Lunes na bumaba ng 30% ang focus crimes mula Enero hanggang Abril 2026 kumpara sa kaparehong panahon noong 2025, dahil sa “Safer Cities” initiative.
Ayon kay PNP chief Police General Jose Melencio Nartatez Jr., layunin ng programa na maiwasan ang krimen sa pamamagitan ng mas mataas na police visibility at mas madalas na pagpapatrolya.
“Last two years ago, that is election period of 2025 as well as the period of 2024, ‘yan yung January, February, March, April, ay malaki ang binawas,” ayon kay Nartatez.
“But there are focus crimes na masasabi naman natin tumaas. But the point here is generally, all of the focus crimes, kapag pinagsama-sama mo, and that is the picture of our crime situation, kapag pinag-compare mo, it is 30% compared to 2024 and 2025,” dagdag niya.
Ang focus crimes ay mga seryosong krimen na madalas mangyari, tulad ng murder, homicide, physical injury, rape, robbery, theft, at carnapping ng sasakyan at motorsiklo.
Dagdag pa ni Nartatez, bumaba rin ng 13% ang kabuuang crime incidents kumpara sa huling tatlong buwan bago ipatupad ang Safer Cities operations.
Inilunsad noong Abril 6 ang Safer Cities Initiative, na nagpapatupad ng mas mahigpit na pagbabantay laban sa pag-inom sa kalsada, paglalakad nang walang damit pang-itaas, late-night karaoke, at curfew para sa mga menor de edad, upang mabawasan ang street crimes. RNT/MND
