MANILA, Philippines — Nagsagawa ng command conference ang Philippine National Police (PNP) sa Camp Crame nitong Martes, Hulyo 8 ng umaga bilang paghahanda sa ikaapat na State of the Nation Address (SONA) ni Pangulong Ferdinand Marcos Jr.
Sa isang pahayag, sinabi ng PNP na ang pagpupulong ay dinaluhan ng hepe ng National Capital Region Police Office, mga district director, at ang mga pinuno ng national headquarters’ directorates for operations, investigation, intelligence, at police community relations.
“The PNP stands ready to uphold its mandate to protect the public and secure national events of great significance, such as the SONA,” saad ng PNP.
Nitong Lunes, sinabi ni PNP Chief Gen. Nicolas Torre III na nagsimula silang makipag-ugnayan sa sergeant-at-arms ng House of Representatives at iba pang kinauukulang opisina para paghandaan ang taunang address ng pangulo sa Kongreso.
Ihahatid ni Marcos ang kanyang ika-apat na SONA sa Hulyo 28, sa pagbubukas ng 20th Congress. RNT/MND
