MANILA, Philippines – Inatasan ng Philippine National Police (PNP) ang lahat ng yunit nito na paigtingin ang intelligence monitoring matapos maaresto ang isang Mongolian aviation student na sangkot umano sa espionage activities sa Iba, Zambales.
Naglabas ng direktiba si PNP chief Gen. Jose Melencio Nartatez Jr. kasunod ng pagkakaaresto noong Pebrero 12 sa 30-anyos na suspek ng mga operatiba ng Bureau of Immigration, katuwang ang pulisya, militar, at National Intelligence Coordinating Agency.
“The safety and security of our nation remain our top priority,” ani Nartatez. “We must remain vigilant and proactive in identifying and neutralizing any threats, especially those involving espionage.”
Inatasan din niya ang mga police unit na “stay alert and act swiftly to protect our national interests.”
Batay sa intelligence reports, kumuha umano ang suspek ng aerial photos ng Iba airport at ng kalapit na Palauig River, na nasa layong humigit-kumulang limang nautical miles mula sa paliparan.
Kinumpirma ng mga awtoridad na ang suspek ay lisensiyadong jet fighter pilot ng Chinese military. Ayon sa National Security Council, itinago nito ang kanyang military background at serbisyo sa People’s Liberation Army, kabilang ang kanyang jet fighter license mula sa PLA Air Force Aviation University. Santi Celario
