MANILA, Philippines- Itinalaga ni Pope Francis bilang bagong obispo ang incumbent Apostolic Administrator ng Catarman diocese, ayon sa anunsyo ng Vatican nitong Biyernes.
Si Bishop Nolly Camingue Buco, 61, ay isa ring auxiliary bishop ng Antipolo at may hawak ng titular ng see of Gemellae sa Byzacena mula noong Hulyo 10, 2018 at na-consecrate noong Setyembre 8, 2018.
Naging apostolic administrator din siya ng Catarman simula Disyembre 8, 2023.
Ipinanganak si Bishop Buco sa Baganga, Davao Oriental, noong Nobyembre 27, 1963. Nag-aral siya ng philosophy sa Sacred Heart Seminary sa Palo, Leyte at theology sa Immaculate Conception Major Seminary sa Guiguinto, Bulacan.
Siya ay naordinahan bilang pari noong Oktubre 18, 1993 para sa diyosesis ng Antipolo.
Si Buco ay humawak ng iba’t ibang posisyon mula nang siya ay maordinahan kabilang ang parish vicar ni Saint Clement sa Angono, Rizal, parish vicar ng Antipolo Cathedral sa Antipolo City, miyembro ng Presbyteral Council, miyembro ng College of Consultors, at priest chargé sa San Isidro Labrador sa Antipolo Hills, Antipolo City at Defender of the Bond sa Court of First Instance.
Kumuha ng master’s degree sa theological studies mula Immaculate Conception Major Seminary sa Guiguinto, Bulacan, nagawaran siya ng doctorate sa anthropology mula University of the Philippines sa Diliman, Quezon City (2003).
Noong 2016, tumanggap ito ng doctorate sa juridical sciences sa San Beda College, Mendiola, Manila, at humawak ng tungkulin bilang parish priest ng Our Lady of Light sa Cainta, Rizal. Jocelyn Tabangcura-Domenden
