VATICAN CITY — Sa isang mapangahas na hakbang patungo sa pagpapanatili ng pagiging “makatao” ng Simbahan sa gitna ng modernisasyon, tahasang ipinagbawal ni Pope Leo XIV ang paggamit ng Artificial Intelligence (AI) sa pagsusulat ng mga homiliya o sermon. Ayon sa Santo Papa, ang pangangaral ay dapat manatiling “totoo at personal”, isang ugnayang nagmumula sa puso ng isang pari patungo sa kanyang mga parokyano.
Sa kanyang pakikipagpulong sa mga pari ng Diocese of Rome nitong nakaraang linggo, binigyang-diin ng 70-anyos na Santo Papa na ang paggamit ng teknolohiya sa espirituwal na aspeto ay may kaakibat na panganib. Ikinumpara niya ang utak ng tao sa isang kalamnan; aniya, kung aasa na lamang ang mga klero sa mga algorithm at AI para sa kanilang mga mensahe, ang kanilang kakayahang mag-isip at magnilay ay unti-unting hihina at kalaunan ay “mamamatay.”
“Ang tunay na homiliya ay hindi lamang pagsasama-sama ng magagandang salita. Ito ay pagbabahagi ng buhay na pananampalataya at personal na engkwentro sa Diyos, isang bagay na hinding-hindi kayang gawin o kopyahin ng AI,” giit ng Papa.
Dagdag pa niya, hindi perpektong retorika ang hinahanap ng mga mananampalataya sa loob ng simbahan. Ang nais nilang marinig ay ang personal na patotoo at karanasan ng isang paring tunay na nakakilala at nagmamahal kay Kristo, na nagbibigay ng inspirasyon sa gitna ng mga pagsubok.
Babala sa Epekto ng Smartphones
Kasabay ng usapin sa AI, nagpahayag din ng malalim na pagkabahala ang Papa sa epekto ng gadgets sa modernong henerasyon. Ayon sa kanya, ang labis na paggamit ng smartphones ay nagdudulot ng matinding kalungkutan at “lamig” sa pakikipagkapwa ng mga kabataan ngayon. Binigyang-diin niya na ang krisis sa mental health ay lalo pang lumala matapos ang COVID-19 pandemic, kung saan maraming kabataan ang mas naging mailap at mapag-isa.
Dahil dito, hinimok niya ang klero na huwag lamang manatili sa loob ng mga parokya. Sa halip, dapat silang maging malikhain sa pag-abot sa mga kabataang nalululong sa gadgets, droga, at karahasan. Iminungkahi niya ang paggamit ng sports, sining, at kultura bilang tulay upang maibalik ang mga ito sa komunidad at maipadama ang tunay na pagkakaibigan.
Hangganan ng Teknolohiya
Bagaman kinikilala ng Vatican na maaaring maging kasangkapan ang teknolohiya sa komunikasyon, iginiit ni Pope Leo XIV na mayroon itong malinaw na hangganan. Hindi nito kayang tumbasan ang init ng personal na ugnayan at ang lalim ng espirituwal na karanasan.
Sa huli, pinaalalahanan niya ang mga lider ng Simbahan na ang kanilang misyon ay maging “buhay na saksi” ng pananampalataya na hindi kayang tapatan ng anomang makabagong makina.
