MANILA, Philippines – Bumaba ng P0.40 kada kilo ang presyo ng liquefied petroleum gas (LPG) simula Setyembre 1, 2026, ayon sa Department of Energy (DOE).
Katumbas ito ng humigit-kumulang P4.40 bawas sa karaniwang 11-kilogram na tangke ng LPG.
Ayon sa DOE, bumaba ang presyo sa kabila ng pagtaas ng international LPG Contract Price mula $634 kada metric ton noong Agosto hanggang $649.50 noong Setyembre. Napababa naman ang kabuuang gastos dahil bumaba ang freight cost mula $120.82 hanggang $94.41 kada metric ton, gayundin ang average peso-dollar exchange rate mula P61.59:$1 noong Hulyo hanggang P61.40:$1 noong Agosto.
“For families who rely on LPG to prepare their meals every day, every peso saved can go toward other household needs. The reduction may be modest, but consumers should benefit whenever market conditions bring costs down,” ani Energy Secretary Sharon Garin.
Sinabi ng DOE na ang international LPG contract prices ay nakadepende sa global market conditions. Para sa Setyembre, tumaas ang presyo dahil sa mas mataas na crude oil prices, geopolitical tensions, supply constraints sa Middle East, at mas malakas na demand sa Asya bago ang winter season.
“Consumers should be able to understand what drives the prices they pay. We will continue to provide clear information on LPG price movements so households can make informed decisions and better manage their expenses,” ani Garin.
Tinatayang nasa P1,031 hanggang P1,536 ang retail price ng 11-kilogram LPG cylinder sa bansa ngayong Setyembre, ngunit maaaring mag-iba ang aktuwal na presyo depende sa brand, lugar, at iba pang market factors.
Pinayuhan din ng DOE ang mga mamimili na ikumpara ang presyo ng LPG sa kanilang lugar at bumili lamang sa awtorisadong dealers at retailers upang matiyak ang kalidad at kaligtasan ng produkto. RNT/MDS
