MANILA, Philippines – May kinalaman ba ang mga tree-planting activities ni Vice President Sara Duterte sa requirement na ipinataw sa Cale88 Foods Corporation, ang banana chip company na iniuugnay sa kanyang asawa na si Manases Carpio?
Ganito ang tanong na ibinato ng abogado ng prosekusyon sa paglilitis nitong Biyernes, habang inihaharap ng depensa si Trade Undersecretary Ceferino Rodolfo bilang testigo.
Tinanong ni prosecution counsel Erwin Matib si Rodolfo kung alam ba niya kung ang tree-planting activities ni Duterte ay konektado sa requirement ng Board of Investments (BOI) na magtanim ng hindi bababa sa 100 forest trees ang mga enterprise upang maging kwalipikado sa incentives.
Sinabi ni Rodolfo na hindi niya alam.
“Sir alam niyo po ba na mahilig magtanim ng mga puno si Vice President Sara Duterte?” tanong ni Matib.
“Hindi ko po alam,” sagot ni Rodolfo.
Bago pa makapagpatuloy si Matib, tumutol si defense counsel Justin Nicol Gular, at sinabing hindi niya nakikita ang kaugnayan ng tanong.
Sinabi ni Matib na may punto siyang gustong patunayan at hiniling kay Senate Impeachment Court Presiding Officer Francis Escudero na ilagay siya sa “short leash.”
Pinayagan naman ni Escudero ang tanong.
“Thank you your Honor. So, tama po ba na itong pagtatanim ng mga puno ni Vice President Sara Duterte ay connected sa pag-comply ng Cale88 Foods sa tree-planting activities na requirement ng Board of Investments?” tanong ni Matib.
“In fact ang requirement po ng Board of Investments ay magtanim dapat ang mga enterprises ng at least 100 forest trees, may gano’ng requirement tama po ba?” dagdag niya.
Muling tumutol si Gular, at tinawag ang tanong na misleading, malicious at callous.
“Objection your Honor, misleading, there is no prior testimony coming from the witness wherein he testified that the vice president participated in the compliance requirement of tree planting,” ani Gular.
“The insinuation being made by the prosecution, that the pictures being shown or that was displayed of the vice president planting trees had any relation to Cale88 Foods Corporation’s registration is misleading, malicious, and callous, your Honor,” dagdag niya.
Binago naman ni Matib ang kanyang tanong, at tinanong kung sumunod ba ang Cale88 sa tree-planting activities. Sinabi ni Rodolfo na kailangan niya itong i-check, dahil wala siyang tiyak na record ng posibleng compliance.
“I’ll have to check po do’n sa specific terms and conditions kung nakalagay po ‘yong sa tree-planting, pero sa pagkaka-alam ko po, kasama po ito sa mga nire-require ng BOI. Pero may time period po for them to, sa pagkaka-alala ko po, may time period for them to also comply,” ani Rodolfo.
“So personally hindi niyo po masabi kung nakapag-comply itong Cale88 do’n sa required tree-planting of at least 100 forest trees?” tanong ni Matib.
“Personally po wala pero pwede ko pong i-check kung nag-submit po sila ng notarized na statement na nag-comply po sila sa compliance po namin,” muling sagot ni Rodolfo.
Ilang beses nang nabanggit ang tree-planting activities ni Duterte sa impeachment trial.
Noong Agosto, nang iharap ng prosekusyon ang ebidensya para sa Article I, na may kinalaman sa umano’y maling paggamit ng confidential funds (CF), sinabi ng isang testigo mula sa Commission on Audit na kabilang ang tree-planting sa mga aktibidad na binanggit ng Office of the Vice President upang bigyang-katwiran ang confidential expenses nito. Ernie Reyes