Kasabay ng pagdami ng mga Pilipinong lumilipat sa solar energy, nanawagan ang isang mambabatas sa gobyerno na protektahan ang mga consumer laban sa mga mapagsamantalang “fly-by-night” solar power providers.
Ayon kay Abra Rep. JB Bernos, bagamat suportado niya ang paggamit ng renewable energy dahil sa benepisyo nito sa kalikasan at matipid na gastos sa kuryente, hindi dapat mapabayaan ang seguridad ng publiko.
Iginiit ng mambabatas na dapat maging proactive ang Department of Trade and Industry (DTI), Department of Energy (DOE), at Energy Regulatory Commission (ERC) sa paghabol sa mga tusong operator.
“the Department of Trade and Industry, the Department of Energy, and Energy Regulatory Commission must be proactive in going after unscrupulous operators whose only motivation is profit, to the detriment of our consumers,” dagdag pa nito.
Ang panawagan ni Bernos ay bunsod ng mga ulat hinggil sa pagkakabit ng mga walang kalidad na solar panels, kawalan ng post-installation services, at mga installation na hindi rehistrado.
Aniya, lantad sa panganib ang mga konsyumer dahil sa mga ulat ng mga solar installation na nasusunog o mga provider na bigla na lamang nawawala kapag kailangan na ng maintenance o pagkumpuni.
Pinayuhan din ng solon ang publiko na dumaan sa tamang proseso gaya ng pagkuha ng barangay clearance, building permit, electrical permit, electrical inspection, at net metering application (Yellow Card).
“I urge our kababayan to undergo the correct process when shifting to solar. This is not only for legality’s sake, but more importantly, it minimizes risk and ensures our safety,” ani Bernos.
Si Bernos ang may-akda ng House Bill No. 3126 o ang On-Grid Solar Energy Systems Bill, na naglalayong maglagay ng solar energy systems sa lahat ng opisina ng pambansa at lokal na pamahalaan sa bansa.
