MANILA, Philippines – Papayagan ang provincial buses na dumaan sa EDSA sa limitadong oras simula Disyembre 20, 2024 at sa lahat ng oras simula Disyembre 26, 2024 hanggang Enero 2, 2025.
Ayon kay Metropolitan Manila Development Authority chairperson Romando Artes nitong Biyernes, Disyembre 6, layon nito na mapagaan ang biyahe ng mas maraming pasahero sa inaasahang dagsa ng mga biyahero sa paparating na Kapaskuhan.
“On a regular basis, hindi sila allowed sa EDSA pero papayagan po natin sila starting December 20 na dumaan sa EDSA starting 10 p.m. hanggang 5 a.m.,” ani Artes.
“At starting December 26 hanggang January 2, papayagan din po sila 24 hours na dumaan sa EDSA dahil maluwag naman po ang daloy ng traffic dyan,” dagdag pa niya.
Mayroong 2,100 provincial buses.
Samantala, inanunsyo rin ng LTFRB ang pagbubukas ng aplikasyon para sa mga special permit sa public utility vehicles (PUVs).
Ayon kay LTFRB chairperson Teofilo Guadiz III, nagsimula noong mga nakaraang linggo ang aplikasyon para sa special permits ng Transport Network Vehicle Services (TNVS).
Para naman sa ibang PUV, ang aplikasyon ay magbubukas sa Disyembre 15.
“Iyong special permits ng TNVS, it opened last week, we have given 5,000 new units for the TNVS,” sinabi ni Guadiz.
“For the special permit for Christmas, we will start opening the application on December 15 and then the special permit would be from December 20, 2024 to January 4, 2025,” dagdag pa niya.
Samantala, ang aplikasyon para sa special permits ng public utility buses (PUBs) noong Nobyembre 18 at nagtapos noong Nobyembre 29.
Ang special permit ay valid mula Disyembre 23, 2024 hanggang Enero 3, 2025. RNT/JGC
