MANILA, Philippines – Arestado ng Bureau of Immigration ang isang Chinese national na wanted sa mga awtoridad sa Beijing dahil sa human trafficking.
Ayon kay Immigration Commissioner Norman Tansingco, ang puganteng 35-anyos na si Wang Chuancong ay sangkot sa pagdadala ng mga kasamahan nito palabas ng China para magtrabaho sa online gaming establishments na nag-ooperate dito sa Pilipinas.
Inaresto si Wang noong Hulyo 30 sa loob ng kanyang condominium unit sa Roxas Blvd., Parañaque City ng mga operatiba mula sa fugitive search unit (FSU) ng BI.
Si Wang ay subject sa detention warrant na inisyu ng municipal public security bureau sa Jinjiang, China.
“We were told that he heads a syndicate that facilitates the illegal departure of Chinese nationals by forging documents to facilitate their outbound travel in China,” ani Tansingco.
“This allows them to travel to different countries including the Philippines to work in online gaming hubs,” dagdag niya.
Si Wang ay isang undocumented alien dahil sa pagkansela na rin ng kanyang pasaporte ng pamahalaan ng China.
Dinala na si Wang sa BI warden facility sa Camp Bagong Diwa, Taguig City bago ang kanyang deportation. RNT/JGC
