MANILA, Philippines – INARESTO ng mga operatiba ng Fugitive Search Unit (FSU) ng Bureau of Immigration (BI), sa pakikipag-ugnayan sa mga awtoridad ng South Korea, ang isang Korean national na wanted dahil sa kanyang papel sa isang malawakang telecommunications fraud scheme sa Korea.
Isinagawa ang pag-aresto sa kahabaan ng Newport Blvd., Pasay City noong Setyembre 25, na nagresulta sa pagkakadakip kay Hong Saebyeok, 24.
Nabatid sa BI na hinahanap si Hong ng mga awtoridad ng Korea dahil sa telecommunications fraud at money laundering, kung saan umabot sa hindi bababa sa 58 ang nabiktima ng humigit-kumulang 50 milyong won o tinatayang 2 milyong piso. Siya ay napaulat na bahagi ng isang sindikato ng pandaraya na nagko-convert ng mga ipinagbabawal na pondo sa piso o cryptocurrency.
Kinumpirma ng Interpol Notice na si Hong ay mayroong standing warrant of arrest na inisyu ng Suwon District Court para sa kasong pandaraya.
Ang pag-verify gamit ang mga tala ng BI ay nagpakita na si Hong ay huling pumasok sa Pilipinas noong Abril 2024 bilang isang temporary visitor. Ang kanyang awtorisadong pananatili ay nag-expire noong Nobyembre 2024, at walang visa extension na inihain, na naging dahilan ng kanyang pagiging overstaying alien, bukod pa sa pagiging isang pugante.
Ang naarestong dayuhan ay inilipat sa BI Warden Facility (BIWF) kung saan siya mananatili bago ang deportasyon. Jay Reyes
