MANILA, Philippines – Sinabi ni Ombudsman Jesus Crispin Remulla nitong Martes na hindi nito pinapayagan si Leyte Rep. Martin Romualdez na bumiyahe para sa isang medical check-up.
Nauna rito, humiling si Romualdez ng travel clearance kay House Speaker Faustino Dy III para sa pagbiyahe sa Singapore mula April 20 hanggang May 4, 2026.
Ayon kay Romualdez, ito ay para sa follow-up check-up kaugnay ng kanyang angioplasty surgery.
Hirit naman ni Remulla, may umiiral na look-out order laban kay Romualdez kaya hindi paborable ang naging sagot ng Bureau of Immigration sa kanyang biyahe.
Dagdag pa niya, naghihintay na lamang na maglabas ng asset freeze order ang Anti-Money Laundering Council laban kay Romualdez matapos magpadala ng endorsement ang Ombudsman.
“We’re waiting for the AMLC to file a freeze order on Martin Romualdez. We already endorsed a complaint to them,” ani Remulla.
Sinabi rin niya na ang unang kasong isasampa ay may kaugnayan sa money laundering, kasunod ng mga ulat na bahagi ito ng mas malawak na imbestigasyon.
Paliwanag pa ni Remulla, maaari namang magpa-check-up si Romualdez sa Pilipinas dahil may mga mahusay na doktor at espesyalista sa bansa. RNT/MND
