MANILA, Philippines – Inirekomenda ni Naga City Mayor Leni Robredo kay Pangulong Ferdinand Marcos Jr. si Supreme Court Senior Associate Justice Marvic Leonen bilang susunod na Chief Justice kapalit ng magreretirong si Chief Justice Alexander Gesmundo.
Sa liham kay Marcos, binigyang-diin ni Robredo ang seniority at mahabang karanasan ni Leonen sa hudikatura, gayundin ang kanyang track record sa mga usapin ng social justice, human rights at judicial reform.
Kabilang sa binanggit ni Robredo ang naging papel ni Leonen bilang government peace negotiator, Acting Chief Justice, chairperson ng mga dibisyon at judicial committees, at kanyang partisipasyon sa modernization initiatives ng Korte Suprema.
Si Leonen din ang namumuno sa mga programa ng Korte Suprema kaugnay ng responsableng paggamit ng artificial intelligence sa judiciary.
Nauna nang kinumpirma ng Supreme Court na si Leonen, bilang pinakasenior na Associate Justice, ang magsisilbing acting Chief Justice pagsapit ng mandatory retirement ni Gesmundo sa Nobyembre 6 habang wala pang permanenteng kapalit.
Bukod kay Leonen, inimbitahan din ng Judicial and Bar Council na mag-apply para sa posisyon sina Associate Justices Alfredo Benjamin Caguioa, Ramon Paul Hernando, Henri Jean Paul Inting at Rodil Zalameda. Ang Pangulo ang pipili ng susunod na Chief Justice mula sa shortlist na ihahain ng JBC. RNT
