MANILA, Philippines – Nag-alok ng tulong si Albay Representative Joey Salceda kay Tourism Secretary Christina Frasco kasabay ng mga kontrobersiya sa “Love the Philippines” campaign.
Ani Salceda, hindi niya ipinanawagan ang pagbibitiw ni Frasco sa posisyon, sa kabila ng nauna niyang pagpuna na hindi naisama ang pamosong Bulkang Mayon sa tourism video ng Department of Tourism (DOT).
“I asked her to fire the consultant. She did. I asked her to correct mistakes and investigate internally. She did. I asked her to be more inclusive with destinations featured. She did. So, no, I will not join calls for her to resign,” pahayag ni Salceda.
“I am asking everyone to help her. I would like to summon the collective intellect, energy, and innovativeness of the brightest minds in advertising and promotions to help the DOT. Albay will help her. I offer to her my personal experience as former governor of Albay,” dagdag niya.
Ayon kay Salceda, sa panahon ng kanyang pamumuno bilang gobernador ng Albay, tumaas ang foreign tourist arrivals ng 4,700%.
Sinabi pa niya na bago ang COVID-19 pandemic, mayroong 1.32 tourists per resident ang Albay na mas mataas kaysa sa 0.57 per resident sa bansa.
Matatandaan na umani ng sari-saring kritisismo ang DOT sa audiovisual presentation nito sa “Love the Philippines” tourism campaign na nagtataglay ng non-original stock footage.
Humingi naman ng tawad ang advertising firm na DDB Philippines, nasa likod ng bagong tourism campaign, sa naturang insidente.
Kagyat namang tatapusin na ng DOT ang kontrata nito sa kompanya.
Anang DOT, walang pondo ng publiko ang nagamit sa proyekto ng DDB Philippines. RNT/JGC
