MANILA, Philippines – Ilang araw bago magbukas ang mga klase sa Hunyo 8, hinimok ni Senador Sherwin Gatchalian si Department of Education (DepEd) Secretary Sonny Angara na tiyakin na may sapat na bilang ng mga tutor sa pagpapatupad ng Academic Recovery and Accessible Learning (ARAL) Program.
Sa ilalim ng 2026 national budget, inilaan ang P8.9 bilyon para sa pagpapatupad ng naturang programa ngayong taon. Inaasahang makikinabang dito ang 6.7 milyong mag-aaral pagdating sa Reading at 8.08 milyong mag-aaral pagdating sa Math.
Layon din ng pondong ito na makapag-hire ng 440,000 tutors.
Ngunit binigyang-diin kamakailan ng Second Congressional Commission on Education (EDCOM II) na mayroong delay sa pagkuha ng mga tutor para sa ARAL Program.
Kabilang sa mga hamong natukoy ang pagkaantala sa pagpapalabas ng mga guidelines at pondo para sa pagkuha ng mga external tutors, kaya umaasa ang mga paaralan sa mga volunteer tutors.
Binanggit din ng EDCOM II ang hindi pagpapatupad ng ARAL Summer Program para sa mga grade levels na walang mga volunteers.
“Hindi sapat na maglaan lang tayo ng pondo para sa ARAL Program. Kailangang tiyakin din natin na may sapat at handang mga tutor, lalo na’t ang papel nila ang isa sa pinakamahalaga para sa tagumpay ng programa,” ani Gatchalian. Ernie Reyes
