MANILA, Philippines – Arestado ang isang 50-anyos na seaman na wanted sa kaso ng Rape makaraang mahuli ito sa naganap na pagtugis ng Malabon-PNP, napaulat kahapon.
Batay sa report na ipinarating sa tanggapan ni Northern Police District (NPD) Acting Director P/BGen. Benliner Capili, ang pagkakaaresto sa akusadong nakilala sa alyas “Roger”, ay nag- ugat matapos makarating sa kaalaman ng mga tauhan ni Malabon Police Chief P/Col. Allan Umipig hinggil sa kinaroroonan nito.
Bunsod nito, isinagawa ng mga tauhan ng Malabon Police Sub-Station 2 ang pagtugis sa akusado.
Nabatid na si alyas “Roger” ay kabilang sa talaan ng mga Most Wanted Person (MWP) ng Malabon CPS.
At dahil sa bisa ng warrant of arrest na inisyu ng Regional Trial Court, Branch 169, Malabon City para sa kasong Rape na walang inirekomendang piyansa, inaresto ng mga tauhan ni Col. Umipig ang akusado nang makorner sa Barangay Tinajeros.
Matapos nito, isinailalim sa medical examination ang akusado bago tinurnover sa Custodial Facility Unit ng Malabon CPS kung saan siya pansamantalang ipiniit habang hinihintay ang utos ng korte para sa paglilipat sa kanya sa City Jail. (Merly Duero)
