MANILA, Philippines – Sinabi ng Securities and Exchange Commission (SEC) nitong Lunes, Oktubre 6 na plano nitong lumikha ng Unified Lending Identification (ULI) para magbigay ng mas madaling credit access.
“And since our national ID system is still not reliable, we intend to introduce the Unified Lending Identification or the ULI,” sinabi ni SEC Commissioner Rogelio Quevedo sa isang Senate hearing.
“We aim to establish a ULI to provide easy access to credit facilities through authenticated data,” dagdag pa niya.
Ang ULI ay isa sa mga proposed actions ng SEC para labanan ang debt collection harassment.
Plano rin ng SEC na magpatupad ng blockchain technology para sa transparent information dissemination sa mga borrower at publiko patungkol sa loan products, interest rates, online lending platforms, at third-party service providers ng financial companies at lending companies.
Sa kaparehong pagdinig, iniulat ng SEC na inaksyunan nito ang 3,570 reklamong natanggap sangkot ang unfair debt collection practices mula Enero hanggang Setyembre 15, 2025. RNT/JGC
