MANILA, Philippines – Iniulat ng OCTA Research nitong Martes ang malaking pagbaba sa self-rated poverty at food poverty ng mga Pilipino.
Ayon sa kanilang Tugon ng Masa survey, 37% ng mga respondente o tinatayang 9.8 milyon na pamilya ang nagpakilala na mahirap noong Disyembre 2025, mula sa 54% o 14.3 milyon pamilya noong Setyembre 2025. Ito ang pinakamalaking single-quarter drop sa kasaysayan ng OCTA.
Sa food poverty naman, bumaba mula 49% noong Setyembre 2025, naging 30% o katumbas ng 7.9 milyon pamilya noong Disyembre, na nangangahulugang 5 milyon pamilya ang nakaramdam na mas kayang matugunan ang kanilang pangangailangang pagkain sa loob ng isang quarter.
Pinaka-mataas pa rin ang negatibong self-ratings sa Mindanao: 67% poverty at 64% food poverty. Sa Visayas, 40% ang itinuturing na mahirap at 33% bilang food-poor. Ayon sa OCTA, ito ay nagpapakita ng patuloy na regional disparities at pangangailangan para sa region-specific na polisiya.
Sa mga pamilya na itinuturing na food-poor, ang median na dagdag na kita upang makaahon sa food poverty ay tinatayang P5,000 bawat buwan mula sa kabuuang gastusin na P10,000. Ipinapakita nito na maliit na pagbabago sa kita o presyo ay malaki ang epekto sa perception ng food poverty.
Samantala, tumaas ang self-rated hunger sa 16% o tinatayang 4.2 milyon pamilya, mula sa 11% noong Setyembre 2025. Pinakamataas ang insidente ng gutom sa Metro Manila at Visayas (22%), at Mindanao (19%). Karamihan sa mga apektadong pamilya (halos 80%) ay nakaranas ng gutom ilang beses lamang, hindi palagian.
Ang survey ay isinagawa sa 1,200 respondents nationwide sa pamamagitan ng face-to-face interviews mula Disyembre 3–11, 2025, na may ±3% margin of error sa 95% confidence level. RNT/MND
