Sen. Marcos, kinuwestyon pagtestigo ng ex-Sandigan justice sa VP Sara impeachment case

MANILA, Philippines – Kinuwestyon ni Senator-Judge Imee Marcos ang pagharap bilang expert witness ni retired Sandiganbayan Presiding Justice Amparo Cabotaje-Tang sa ika-24 na araw ng impeachment trial laban kay Vice President Sara Duterte nitong Lunes.

“Nagtataka ako kung bakit narito ang ating testigo dahil hindi naman siya nagkukumpirma ng mga dokumento at wala namang maidudulot na tulong tungkol sa mga facts. Will she testify to matters and questions of fact or identify documents specifically?” tanong ni Marcos.

Paliwanag naman ni House prosecutor Rep. Chel Diokno, hindi iniharap si Cabotaje-Tang upang tumestigo sa mga facts o mag-authenticate ng mga dokumento, kundi upang ipaliwanag ang legal framework kaugnay ng pondong tinatalakay sa impeachment case.

“Hindi siya magsasalita tungkol sa alinman sa mga katotohanan o dokumento na ipapakita. Iniharap lamang siya upang magbigay ng legal na balangkas sa korte at sa mga mamamayang Pilipino kung saan nagmumula ang pinag-uusapang pondo,” ani Diokno. RNT