MANILA, Philippines – Kinuwestyon ng Lingayen-Dagupan Archbishop Socrates Villegas ang naging pagbabago ng liderato sa Senado at ang umano’y papel nito sa pagharang sa pag-aresto kay Senador Ronald dela Rosa.
Sa pastoral letter na may pamagat na “Sad and Angry, but Brave and Hopeful” na inilabas noong Mayo 17, sinabi ni Villegas na tila may layunin ang biglaang pagpapalit ng liderato sa Senado mula kay dating Senate President Vicente Sotto III tungo kay Senate President Alan Peter Cayetano na makapagpabagal sa impeachment proceedings laban kay Vice President Sara Duterte.
“The sudden change in the leadership of the Senate is like graffiti on the wall showing another devious plan to delay the trial,” aniya.
“It was not for the country but for somebody,” dagdag niya.
Pinuna rin ng arsobispo ang umano’y paglalagay sa “protective custody” kay Sen. Ronald dela Rosa habang may umiiral na arrest warrant mula sa International Criminal Court (ICC) kaugnay ng war on drugs ng nakaraang administrasyon.
“The Senate is now used as a shield for a suspect-at-large with a valid warrant of arrest from a lawful court,” aniya.
Nanawagan si Villegas sa publiko na maging mapanuri sa mga halal na opisyal at gamitin ang kanilang boto para sa pagbabago.
“Reject the corrupt in the next elections. Review and evaluate their records of public service. Your vote is your power. Use it to the maximum,” sabi niya.
Hinimok din niya ang mamamayan na itaguyod ang reporma sa mapayapa at legal na paraan, at iginiit na ang pananahimik sa gitna ng pang-aabuso ay nagdudulot ng patuloy na katiwalian at abuso sa kapangyarihan. RNT/MND
