MANILA, Philippines – Siniguro ngayon ng mga commuter sa Metro Manila at iba pang urban areas sa mga probinsya ang maayos at walang patid na pampublikong transportasyon habang sinisimulan nang suriin ng Land Transportation Franchising and Regulatory Board (LTFRB), sa ilalim ng gabay ni DOTr Secretary Giovanni “Banoy” Z. Lopez, ang guideline para sa pagpapatupad ng service contracting program.
Sinabi ni LTFRB Chairman Atty. Vigor D. Mendoza II na ang hakbang ay isa lamang sa maraming pagsisikap ng pambansang pamahalaan na ipaabot ang lahat ng kinakailangang tulong sa kapwa commuters at public transport sector sa gitna ng epekto ng tensyon sa Middle East.
Ito ay alinsunod sa tagubilin ni Pangulong Ferdinand “Bongbong” R. Marcos, Jr. na i-maximize ang tulong sa mga commuters.
“Ang mga lugar ng operasyon ng service contracting para sa land-based na pampublikong transportasyon ay batay sa data analysis sa commuter traffic volume at interconnectivity sa mass transport system,” sabi ni Chairperson Mendoza.
Kaugnay nito sa kaso ng Metro Manila, sinabi niyang kasama sa service contracting ang EDSA Bus carousel program at mga moderno at tradisyunal na jeepney na may mga rutang dumadaan sa mga istasyon ng LRT at MRT at mga pangunahing hub ng transportasyon.
“Ang mga rutang ito ay binigyang-priyoridad dahil sinusuportahan nila ang koneksyon sa mga sistema ng transportasyon ng tren, nagsisilbi sa mga corridors ng mataas na demand ng pasahero, pagpapabuti ng pangkalahatang mobility ng commuter, at tumutulong na mabawasan ang pagsisikip ng trapiko sa mga pangunahing lugar,” sabi ni Chairperson Mendoza.
Sa iba pang urban areas tulad ng Davao City at Cagayan de Oro City, ipatutupad aniya ang programa sa iba’t ibang ruta batay sa traffic ng pasahero at iba pang salik na nakakaapekto sa maayos na transportasyon ng kasing dami ng commuters.
Samantala sinabi ni Secretary Lopez na magsisimula ang programa sa Abril 15.
Ang service contracting ay pinondohan sa ilalim ng General Appropriations Act para sa 2026 at sinabi ni Chairperson Mendoza na ang programa ay ipapatupad sa pinakamaagang posibleng panahon sa gitna ng mga epekto ng tumitinding tensyon sa Middle East.
Ang service contracting ay isa sa mga hakbang na ipinapatupad ng pambansang pamahalaan upang sugpuin ang mga epekto ng tunggalian sa Gitnang Silangan. Santi Celario
